Guddoomiyaha Jaamacadda Muqdisho oo ka hadlay waxbarashada dalka

Guddoomiyaha jaamacadda Muqdishu Dr. Cali Sheekh Axmed Abuubakar ayaa shalay u khudbeeyay jaaliyada Somalida ee dalka Nederlands.

Gudoomiyaha ayaa ka hadlay xaalada waxbarasha ee dalka Soomaaliya isagoo sharraxay horumarka waxbarasho ee ka jira dalka iyo caqabadaha la soo gudboonaada.

Dr. Cali ayaa sheegay in ardayda wax ku barata gudaha Soomaaliya ay yihiin kuwa awood u leh in ay la qabsadaan waxbarashada dalalka dibadda, isagoo xusay in ay jiraan kumannaan arday oo dugsiyada sare ee dalka Soomaaliya ka soo qalinjebiyay,kuwaasoo wax ka barta jaamacadaha uga wanaagsan caalamka ee ku yaalla qaaradaha Ameerika, Yurub, Afrika iyo Aasiya.

Guddoomiyaha mar uu ka hadlaayay caqabadaha ku hor gudban waxbarashada gudaha wuxuu tilmaamay in dhibaatada ugu weyn ay tahay manhajka wax barashada dalka oo ah mid liita, taasoo laga dhaxlay dowladdii dhexe iyo gumeystihii dalka heysan jiray.
Dr. Cali ayaa sheegay in manhajyada kala duwan ee dalka ay wareer ku yihiin ardayda, sida kuwa Talyaaniga, Ingriiska, Faransiiska iyo Carabiga, wuxuuna ku taliyay in hal manhaj ah oo casriyaysan uu u wanaagsan yahay waxbarashada gudaha.

Posted in: Tacliinta