Madaxwayne Faroole oo ka soo dagay xarunta P/L ee garoowe

Madaxweynaha Dowladda Puntland Dr.Cabdiraxmaan Sheikh Maxamed Maxamuud ayaa galabta soo gaaray magaalada Garoowe ee caasimada Puntland,ka dib markii uu kasoo ambabaxay magaalada Jabuuti isaga iyo wefdi uu hogaaminaayo.

Wefdiga Madaxweynaha waxaa garoonka Konacco kusoo dhoweeyey Madaxweyne Kuxigeenka Jenraal Cabdisamad Cali Shire, Guddoomiyaha Baarlamaanka Cabdirashid Maxamed Xirsi iyo xubno ka socday Xukuumada iyo Baarlamaanka.

Markii wefdigu soo gaarey madaxtooyada ayaa waxaa halkaas warbixin kooban ku siiyey Madaxweyne ku xigeenka Puntland Gen.Cabdisamad Cali Shire.

Madaxweyne kuxigeenka ayaa soo hadal qaaday howlgal ay Ciidanka Puntland kusoo furteen kooxo Burcadbadeed ah oo afduubtay Markab kusoo jeeday dekadda Bosaaso ayadoo la qabtay raggii afduubtay oo ay xireen Ciidanka..

Madaxweynaha Puntland ayaa isna halkaas ka hadlay,wuxuuna sheegay inuu ku faraxsanyahay intii ay dalka ka maqnaayeen ciidamada Puntland howlihii ay ka qabteen dalka.

Wuxuu ka warbixiyey safarkii dibada uu ku tegay iyo shirkii ka dhacay magaalada Istanbul ee dalka Turkiga oo ay ka qaybgaleen isagoo sheegay in halka khudbadii guud uu ka jeediyey Madaxweyne Sheikh Shariif tii qayb ahaan ay ka jeedisay Dowladda Puntland oo uu jeediyey Wasiirka Maaliyada Faarax Cali Shire

Sidoo kale wuxuu sheegay in halkaa ay wax badan uga hadleen isla markaana ay sheegeen baahi kasta oo ka jirta degaanada Puntland, wuxuuna xusay in ganacsatada Puntland uu u sheegay in la dhimay qiimaha ganacsiga Xoolaha geela iyo ariga.

Dhanka kale Madaxweynaha ayaa sheegay in ay hay’adaha deeqa bixiya kala hadleen sidii Puntland loo gacan qabana lahaa isla markaana loo dhisi lahaa kaabayaasha dhaqaale.

Dr.Faroole ayaa ka hadlay dagaaladii dhowaan ka dhacay degmada Buuhoodle ee xarunta gobolka Ceyn oo u dhaxeeyey Ciidamada Itoobiya iyo dadka degaanka,wuxuuna sheegay in ay aad uga xunyihin isla markaana Dowladda ay raali ka ahayn.

Madaxweynaha ayaa intaa ku daray in aysan raali ka noqoneyn waxaa uu ugu yeeray Jabhad sheegata in ay soo xoreynayso magaalada Laascaanood.

”..Cida hadda sheegata in ay yihin Jamhadda xoraynaysa dalkeeda ay tahay mid ay wataan dad siyaasiyin ka ahaan jireyn Dowladda Soomaaliya iyo meelo kale ayna doonayaan dan kale iyo waxaa aan u soconaynay hadii cid soo celinaysa Laascaanood ay jirto ay Dowladda soo celinayso sidii ay doonto haku soo celisee, ma ahan wax aan saxaafadda u faahfaahineyno, laakiin maamulka hadda ku sugan Laascaanood sidii uu uga kici lahaa waa wax dawladda u yaala…..”‘ ayuu yiri.

Madaxweyne Dr.Faroole ayaa eeda dagaalkii ka dhacay Buuhoodle dusha uga tuurey Jamhadda cusub ee halkaas gaartey, mana ahan wax ka shaqeynaaya ayuu yiri danaha Puntland. ugu danbeyntii madaxweynaha ayaa sheegay in Jamhaddaas laga mamnuucay Dawladda Puntland, wasiiradu isku raaceen Baarlamaankana loo gudbinaayo dhawaan.

Si kastaba Madaxweynaha ayaa in mudo ah ku maqnaa dalka dibadiisa, waxaana socdaalkiisa ku weheliyey Wasiirka Maaliyada iyo xubno kale.

ALLHORYAAL
Garoowe

Posted in: wararka